Feysbuk sosial şəbəkəsində “Kazxchkasbd” adlı səhifə yaradılaraq Kapital Banka hədəflənmiş fişinq hücumu başlayıb.

Bu haqqda məlumatı Xüsusi Dövlət Mühafizə Xidməti Xüsusi Rabitə və İnformasiya Təhlükəsizliyi Dövlət Agentliyi yayıb.

Məlumatda qeyd olunur ki, Feysbukda “Kazxchkasbd” adlı səhifə “BirBank BOKT” MMC-yə məxsus korporativ stildə üzərində “daxil ol 500 azn ve iphone xs max qazan” başlıqlı Azərbaycan seqmentində sosial şəbəkə istifadəçilərinin şəxsi məlumatları ələ keçirilməsi məqsədilə reklam kampaniyası başladılıb. Reklam kampaniyasının üzərinə klik etdikdə “birrbankaz.com” saytına keçid təyin edilib.

Adıçəkilən saytın məzmununda isə “BirBank BOKT” MMC-nin elektron xidməti olan “İnternet-bank”a oxşar, məzmun daxilində “İnternet-banka daxil olmaq” başlıqlı, şəxsi kabinetə daxil olmaq üçün tələb olunan telefon nömrəsi və şifrənin daxil edilməsi üçün nəzərdə tutulmuş müvafiq sahələr yerləşdirilib.

Güman edilir ki, hakerlər Qazaxıstanda “HALYK BANK”, Kanadada “Scotiabank” və Azərbaycanda “KapitalBank” banklarını hədəfə almış fişinq hücumları həyata keçirməkdədir. Fişinq hücumu həyata keçirən sayt Xüsusi Dövlət Mühafizə Xidmətinin Kompüter İnsidentlərinə qarşı Mübarizə Mərkəzi tərəfindən yaradılmış “Qara siyahı” (//blacklist.gov.az/) xidmətinə əlavə edilib.

XDMX KİMM Azərbaycan vətəndaşlarını diqqətli olmağa çağırır, bu kimi şübhəli məzmunlu internet informasiya resurslarını aşkar etdikdə, Kompüter İnsidentlərinə qarşı Mübarizə Mərkəzinə müraciət etmələrini xahiş edir.