Deep learning
Deep learning

AMEA İnformasiya Texnologiyaları İnstitutunun əməkdaşlarının “Sosial media verilənlərində kiberhücumların aşkarlanması üçün “Deep Learning” üsulu (Deep Learning Method for Prediction of DDoS Attacks on Social Media) adlı məqaləsi “Advances in Data Science and Adaptive Analysis” jurnalında çap olunub.

TED.az xəbər verir ki, məqalənin müəllifləri AMEA-nın vitse-prezidenti, İnformasiya Texnologiyaları İnstitutunun direktoru, akademik Rasim Əliquliyev, institutun şöbə müdiri, AMEA-nın müxbir üzvü Ramiz Alıquliyev və aparıcı elmi işçi, texnika üzrə fəlsəfə doktoru, dosent Fərqanə Abdullayevadır.

Məqalədə sosial media mətnlərinin intellektual analizi əsasında kiber-hücumların aşkarlanması üsulu təklif edilib. Burada analizi həyata keçirmək üçün dərin təlim üsulu istifadə edilib. Üsul, sosial mediada relevant mətnlərin tapılması yolu ilə kiberhücumların baş vermə ehtimalını yüksək dəqiqliklə, az itkiyə yol verməklə proqnozlaşdıra bilir.

Qeyd edək ki, məqalə Azərbaycan Respublikasının Prezidenti yanında Elmin İnkişaf Fondunun maliyyələşdirdiyi “Böyük verilənlər (“Big data”) mühitində informasiya təhlükəsizliyinin təmin olunması metodları və alqoritmlərinin işlənilməsi və onların bəzi tətbiqləri” adlı qrant layihəsi əsasında hazırlanıb.